طبعاً كلنا عارفينه

مش ده اللى غرّق سفينه تيتانك

وحطّم قلب روز

ايون هو ده بالظبط

طب غرّق السفينه ليه بالرغم من ان السفينه لحقت ولفت قبل ما تتصدم فيه

غرًّقها لإن المخفى من الجبل تحت الميه اكتر بكتيييير من اللى ظاهر للناس فوق الميه

ايوه وعلشان كده السفينه اتحطمت من الدور الارضى من تحت دور البدروم بتاع الفحم اللى بيشغلها

طب انتى جايه تقلبي علينا المواجع يعنى اكيد لأ

بس عايزه اقولكم ان كل انسان مننا زى جبل الثلج في تكوينه

اللى ظاهر منه للناس اقل بكتيييير من المخفى عن العيون

ظاهر مننا شكلنا وهيئتنا وتصرفاتنا بس

وما خفىّ كان اعظم

مشاعرنا…….

افكارنا ……

القيم بتاعتنا….

معتقداتنا…..

كل ده متدارى عن العيون والانظار

وبالرغم من انه متدارى إلا انه السبب الرئيسى في اللى ظاهر مننا

يعنى هو المسئول عن تصرفاتنا وهو اللى بيشكّل هيئتنا

وظيفة الكوتش انه يغوص بيك في البحر المثلج ده

ينزل معاك للاعماق علشان تكتشف عالم مليىء بالاسرار اللى يمكن تكون اول مره تعرفها عن نفسك

ولو لقى في طريقه اى فكره خطأ اخدتها في يوم من الايام

بيعرف ازاى يخليك انت بنفسك تصححها

ويا سلام لو اثناء الرحلة وصلتوا لمعتقد سلبي اترسخ فيك من وانت طفل مثلا وببعض الاساليب اللى درسها قدر يساعدك انك تغير المعتقد ده وبنفسك لمعتقد تانى اكثر ايجابيه

هتطلع معاه من البحر واحده واحده وانت بتتغير من غير ما تحس

هتلاقى تصرفاتك بقت افضل

وهيئتك كمان بقت احسن

وحالك بقه اسعد

وبقيت اكثر إيجابيه

وكل ما تتمنى تغيّر تصرف عندك مش عاجبك هينزل يضرب معاك غطس في البحر في رحلة استكشاف كلها اثاره ومتعه وتشويق

هيخليك توصل لاحسن صورة منك

هى دى وظيفه اللايف كوتش في حياتنا

وهى دى قصة جبل الجليد

وإلى اللقاء في قصص اخرى

مستوحاة من كورس علم النفس الإيجابي

تحت قيادة المايسترو نهى بنت احمد زهره

وعلى فكره جبل الجليد اللى في الصورة ده من تنفيذى