كتّر خيرك ….كفّيت ووفّيت الحمد لله ………………….. امبارح كنت بضرب كمية حلوة من العصير في الخلاطولمّا خلّصت استخدام الخلاط وبنضفه وبشيل الفيشه لقيت نفسي بقول :كتّر خيرك …. كفّيت ووفّيت …. الحمد لله ركزت مع نفسي شوية ان الكلمة دى طول عمرى بسمعها من ماما لمّا تخلّص استخدام الخلاط او استخدام حلة الكهربا بتاعة الرقاق في ايام العيد زى اليومين دول (كل عيد وانتم بخير )كانت بتقول : كتّر خيرك كفّيت ووفّيت الحمد للهلما كنت اسمعها كنت بقولها انتى بتشكرى الخلاط والحلة تقولى : لأ ….. انا بدعى ربنا يكتّر من خيرهم عندى ويباركلى فيهم من اى تلف وبحمد ربنا على وجودهم لانهم بيسهلوا عليّا كتير في شغل البيت لمّا درست علم نفس إيجابي عرفت ان اجمل حاجة تخلى الانسان ايجابي وسعيد هى الامتنان Gratitude اسهل تمرين لتفعيل الامتنان انك تكتب او تذكر ٣ حاجات او نعم او اشخاص ممتن لوجودهم في حياتكماما ما درستش علم نفس إيجابي بس بتطبقه بالفطرةدايما تقول : من حمده زاده قال تعالى : ” ولئن شكرتم لأزيدنّكم ” سورة ابراهيم ٧ فعّلوا الامتنان في حياتكم ربنا هيرزقكم ويزيدكم تمرين الامتنان بتاعى امبارح كتبت فيهالحمد لله على : ١ / نعمة وجود أمى في حياتى ( ربنا يبارك في عمرها )٢ / نعمة الصحة وانى بقدر اعمل كل حاجة لنفسي ولحبايبي٣/ نعمة وجود الخلاط اللى سهّلى عمل العصير تمرين جميل جدا جدا وبيخليك تكتشف ان عندك نعم كتير قوى يمكن إلِفتها ومش بتحمد ربنا عليها زى الخلاط مثلاًنعم لا تُعد ولا تُحصى عندنا بس علشان نملكها غفلنا قيمتها اللى اهم من النعم ادراكنا انها نعم فمن فضل الله تعالى علينا انه ارشدنا لقيمتها ولشكرها اكبر فايدة من تمرين الامتنان انه بيخلينا نركز على الموجود فلا ننشغل بالمفقودقولولى نعمة نورت في دماغكم دلوقتى كنتوا بتنسوا تشكروا ربنا عليها